Home » » محمد عبد الجواد يكتب : القصيدة المجنونة

محمد عبد الجواد يكتب : القصيدة المجنونة

رئيس التحرير : Unknown on الخميس، 21 نوفمبر 2013 | 8:36 ص


أمانة يا ليل
ياليل طول
وعيد الحزن
من الأول
ليه مكتوب لى نعيش فى بعاد
وأعيش فيكى مع الأوغاد
ولو ننسى همومنا فى يوم
نقول إمتى بقى تتعاد
أنا العابد وأنا الناسك فى محرابك
ومكتوب لى أقف حيران على بابك
اخبط ليه ما يفتحشى
أبات فى الطل ..
واخد فى حضنى أحزانك
انادى ليه ما بترديش
وأمشى وانت ما بتمشيش
وألاقى فى كل طرقاتك
حاجات وحشة متسعدنيش
أبات مهموم وما افرحشى
وبساتينك ما تطرحشى
وأغنى حزين وأنا المجروح
وقلبى لسه ما سامحشى ..
أقول لك توحشينى ازاى
وانا المنسى على بابك
وشارب مُر فى عذابك
ونفسى يوم أشوف الفرح
واضم فى حضنى أحبابك
انا المزروع هنا فى طينك
زرعتى فى قلبى سكاكينك
وعمرك ما داويتى الجرح
وضاع صوتى مع أنينك
زرعتك بالأمل بستان
رويته بالعرق والدم
طرح قمحه فى فدادينك
وودع عمره فى سنينك
أنا الدرويش مفصل بدلتى من الخيش
با أدوب فيكى .. وأغنيكى
يا غنوة فى القلوب صاحية
ما تيجى نعيش
يا ليل الغربة لا تطول
وغنى وعيد من الاول
بحبك فى ليالى البعد
كتير وأكتر من الاول

كتبتك صفحة فى كتابى
نقشتك اسم على بابى
وكان نفسى اللقا يطول
يا طول البعد يا عذابى

سامحتك رغم طول البعد
و قادر ع السهر والسهد
وكل صباح اقول بلدى
آلاقى قلبى دق بجد

سنين العمر سرقانى ووخدانى وانا اللى عشت وحدانى..
زرعت هوايا فى ارضك طلع وردك ومن غير شوك..
انا الهايم هنا فى حبك وافرح لو انا فى حضنك ..
صباح الفل يا بلدى دى جنة ربنا فى ارضك
انا اسمك انا شكلك وأنا المعجون بنور الفجر جواكى...
انا رسمك وانا نقشك وانا ارضك وانا سماكى...
انا الشاكى وانا الباكى وكل مرار فى أيامى
يدوب لما ابقى وياكى..

محمد عبد الجواد
إنشر هذا الخبر :

إرسال تعليق