شعر/ سمير الأمير
تهرب منى الكلمات
إذا بالذات اتشرنق
وتداعب خيالاتي أحط النزوات
أنا مش قاصد أقول أشعار
أنا بس بحاول اشد خطاوى الأفكار
بره عتبة نفسى
وبحاول احاصر أسباب الإحباط
فيا وفى اللخوات
اللى بيقعدوا فى الندوات حلوين
أو بيتسكعوا على الناصية" راندبلوا"
لما يكونوا فاضيين
مع إن "بهيه" مش في البتارين
بهيه طافحه الدم في طين فدادين
عزبة صاحب "راندوبلوا"
خليك انت اتشرنق
واغرق ف البيانات و التسميات
هاتها من أول شارع هات
وادخل كل الدكاكين
المفتوحه بتصريح رسمى م السلطات
أو عرفى بحكم التدكين
مسكين ......
عمك "باولو" حيفرح بيك
شيلها في عنيك
واشربها بعدين
لما تعوز تتشرنق ويا اخواتك
وتمسى على إحباطك
واعزمنى
ما أنا زى حلاتك
محبط وحزين
بايع أحلامي بمفيش
الظرف الوطنى محتاج تطنيش
قربع دلوقتى
وانسى موضوع العيش
بعدين ..متفوقنيش... بعدين
هزتنى الحكايات يابو وشين
يابو وشين اظهر فى مرايتك
واحزر تحكيلى حكايتك
تاخد كام و تبيع كوبايتك
تاخد لبنان والا فلسطين؟
تاخد البطران المبلول
والا العدمان الناشف؟
طول عمرك خايب فى الجغرافيا
مش فالح غير فى القافيه
والنكته البايخه والتلسين
خليك انت اتشرنق واغرق فى البيانات والتسميات
هاتها من أول شارع هات
وادخل كل الدكاكين
المفتوحة بتصريح رسمى م السلطات
أو عرفى بحكم التدكين
كل الدكاكين سيان
طول ما انت لسه عيان!!
_49344.jpg)
إرسال تعليق