م المستحيل الشعر يبقى بديل لصوت الناس
الشعر إحساس فرد شاعر ...بس
فاتكلموا على قدكم يا مدّعين الحِس
ما تزيفوش صدق انتفاض العشق بشوية كلام
ما ألعنُه كُتر الكلام
ما تكتفوش المعنى بالوهم اللى طالع من حلوقكم .. جعجعه
أشجع ما فيكم إمّعه
ساعة مايبقى الدم هو القصيدة الواقعيه المُفجعه
***
إخلوا الميدان لشباب بيعرف سكته
حُريته ... أو .... لا حياه
حُريته هيه الحياه
إخلوا الميدان لشباب مالوش فى برطمة العَجَز
ولا تهتهة ياس السنين الملح
خلوها تتميز بغيظ
تفتح سبيل للمؤمنين بالجرح
تشعل نيرانك يا وطن
إخلوا الميدان من الإهانة والاستكانه والعفن
م اللى راهنوا ع الخيابه وللخيابه مرهونين
م اللى رافعين اليفط كالبياعيين
م اللى فاشخين بُقهم بالزيف فى براويز الصور
إخلوا الميدان من الرجال المنفوخيين تهييص\المليانين تعريص
فليسقط التهجيص
عاش العيال المجنونين السيس
آخرة حدود الصبر ف الوطن التعيس
***
آخر كلام
الأنبياء فى المعركه سال دمهم
واستشهدوا كالسيل .. لكنهم هزموا البوليس
أخر كلام ..للشاعر الكبير سمير الأمير
.jpg)
إرسال تعليق