أغنية العطش..شعر : فتحى البريشى

.. أغنية العطش .... 

شعر : فتحى البريشى ..

.. عطشااان .. قوى ..

وقلتك

مليانة فوق سور البراندة

تصيب قوى ..

أجدعها سقا بالعطش ..

وانا حلقى أرض شراقى ..

لو .. مر النفس .. يدبح ..!!

عطشان قوى .. و ..

مديت إ يدى لقلتك ..

وبعد ميت مليون محاولة رفع ..

.. فييييين ..

على بال دراعاتى ماشمت

ريحة الحضن اللى ياما حلمت بيه

.. مديت إ يدى لقلتك ..

بعدت قوى .. !!

يا .. حسرتى ..

على قلب عاش الحلم

مخنوووق .. بالعشم ..

حلمك عليه يا سيدة كل السنين

دقاته غلفها الألم

غلى ف غرامك .. 

ألف مهر ومهر .. لكن ..

شورى

.. على سكة يوصل منها ..

لو كانت خطاويها سنين عمره ..

.. ح يمشى القلب .. لو ..

يصبح عدم

عطشان قوى ..

و بنظرة منك

تتروى الصحرا اللى جوايا

اشتعالها حرقنى .. آ ... ه ..

ما تبصيليش على إنى ميت فيكى

مجنون بك .. ولا ..

راجل ح ياخدك .. ع الحصان الأبيض

.. و يوصل للسحاب

شوفى رضيعك فى

شوفى بكايا فوق صدرك

وشوفى صراخى

.. لحظة ما اتفزع من نومى ..

متشعلق فى اسمك

النظرة تحيى الحلم

والعمر اللى ضايع ..

بين دروب الموت .. وعشقك ..

قدمت لك كفنى .. هدية ..

وروحى .. على كفين إيدى

.. وقلت لك :

أمى اللى قاتلهم غرامك

واقلقى مرة ف منامك ..

صلى بينا

سجدة السهو اللى ممكن

.. تشفى واحد مننا ..

صدرى وجعنى م العنا ..!!

مسكووون .. بمواويلك ..

مدروش ..

وانتى فيها مفرعنة ..

ملعون أبو الأناشيييد

.. فى طوابييير الصباح ..

هى اللى بتعلم ولاد المقروفين

الحب ..

وأصووول الغنا ..

صدرى وجعنى م العنا

صدرى وجعنى م العنا

صدرى .. وجعنى ..

.. م الغنا ..