فراغة عين للشاعر الكبير \ سمير الأمير
إيه معنة إن التخلف مخلف فى كل حارة عيال
أو إنه والد بنات أفكار عظايا ومقرفين
معناه بإن الدين بينزلوه من مطرحه ف القلب
ويحولوه سلعه ف دكاكين السياسة
معناه بإن الطهر يدارى
عشان تظهر أساليب النجاسة
ملناش بقى ف الصبر يا رفاقه
ولا ف انتهاج السلم وقت الحرب
إحنا اتسرقنا سنين من العسكر
ولما فوقنا لقينا دول على ضهور الجمال جايين
شيوخ أذناب شيوخ - أذناب شيوخ منسر
ريحة عرقهم جاز ولون علمهم سيفين واقفين ف غيط أخضر
بيحشوا صبح الأمل ويلبسوا الناس أمسهم ويأسهم بالغصب
رافعين مصاحف أمية يقولوا "دولة ودين"
عارفين حبايب النبى إحنا يا مصريين
الطيبة فى طبعنا وسماحة الإسلام.
رافعين مصاحف أمية لكن بقى على مين؟
بصوا ياناس ف الوشوش ما تبلعوش الكلام
حتلاقوا خلف الرتوش بشاعة الوجه اللئيم
تجار جوارى وعبيد وكتامين أحلام
ومعلمين الشيطان يفتى فى عشق الوطن
ويجود القرآن
يرطن بألف لسان
عن مين ومين ابن مين.
إن الدقون على الجتت هى دليل الإيمان
- (ولو أنها كانت حشيشا لأطعمناها خيول المسلمين)
أستغفر الله العظيم. أستغفر الله العظيم
زفة مظاهر عندهم. بس اللوع واحد
الكدب غار من كدبهم
وقلبهم جاحد
بيقطعونا حتت ويقولوا مرتدين
وبيدفنونا من غير صلا ولا شاهد
بيقولوا ده ناصرى ودول شيوعيين
ودول عيال شاردين مالهومش مله ودين،
بيقطعونا إزاى. يا حسرة الإنسان؟
مش كنا ف المعركه وكل البشر إخوان؟
واكلين معانا العيش شاربين معانا الشاى
ومسددين الحساب. يوم الحساب ف الميدان
والدم كان للركب ما عرفنا مين من مين؟
عاش الهلال والصليب. والكل مصريين؟
يا عم بطل طيابه ده لكل وقت أدان
دم الشعوب سلمه للحكم والسلطان
دى الوقتى قالوا "انتخاب" شفتوا فراغة العين
يعنى الصبيه قبل الجواز تولد
قولنا احنا "كتب الكتاب قبل الدخول يا ولاد. العرف زى الدين
دستور يا أمة محمد. واضح ومتحدد
الشرط نور النبى. يهدى سبيل القبط والمسلمين
مش ربنا أرسله للعالمين رحمة
عايزينها ليه بالغلط بتخموا فى الزحمة؟
وكمان لسانكم فلت قلتم علينا اللى فيكم
طلعتوا فينا القطط. بتداروا بلاويكم
أنا مش غبى زيكم بالكفر أرميكم
قادر كريم ربنا.
يا يا خدكو من وشنا يا إما يهديكم.
يا يا خدكو من وشنا يا إما يهديكم.
إرسال تعليق