رسالة إلى مصر

بقلم نادية النادى

أمى الحبيبة :

يعز على أشوفك كل يوم تبكى على ولادك , وينفطر قلبك على أحوالهم ، يا أمى كلهم تايهين وغابوا عنك وعن نفسهم ، وحلمهم أصبح سراب ، والغشاوة عمت عينيهم ،والحق تاه مع الباطل ، الكل تعبان وحيلهم إتهد ، اللى شافوه يا أمى ما كان سهل ، صغار وكبار كلهم نفسهم يعيشوا والبسمة ترجع ليهم ،.

أنا زيهم نفسى أعيش وأفرح من قلبى ، وأجرى وأحضن أرضك وسماكى ،وأنشد أجمل كلماتى حب وأمل فى بكرة ، ونفسى ألاقى وشوش ولادك تتلاقى بحب .

قولى لى يا أمى أعمل إيه أرضيكى وترضى عنى ، أنا بحبك حب غالى ملأ قلبى اللى خرج ينبض على أرضك الطاهرة ، أنا بتألم لما أشوفك كل يوم دموعك على خد أولادك ، حزن وألم ليل ونهار يعصر قلوبهم .

يا أمى ولادك كلهم طيبين وقلوبهم نقية ,لكن اللى بيحصل ليهم شئ مش عادى ، والدليل فى عز الأزمة قلوبهم وإيدهم تتشابك ، وقوتهم فى مواجهة عدوهم تمسح كل خلاف ، مش قلت لك إن قلوبهم نقية .

إعذرينى يا غالية أنا نفسى أقول وأتكلم ، وقلبى بيتقطع ، لكن الكلام جوايا مش عايز يخرج .وفى القلب بيوجع ، سامحينى أنا بحبك وعارفة إنك بتحبينى .

وأخيرا لك منى كل الحب سلام يا أغلى أم

إبنتك الغالية