شعر محمد عبد الجواد يكتب : قهوة التوك شو ؟!

شعر محمد عبد الجواد 

قرب قرب 

فتش جرب 

امسك يلا أى ريموت 

علقة تفوت ولا حد يموت 

خش بسرعة على التوك شو 

كله فضايح التوك شو 

تجار شنطة وقالوا إعلام 

سرحوا بينا مع الاحلام 

سلموا روحنا للأوهام 

خبط ورزع زعيق وسواط 

على رأس أم ابن العياط 

المسألة محتاجة تركيز 

علشان تخرج بالبهاريز 

أدى محطة جنب محطة 

دخل العكش ونط النطة 

شغل أونطة ومش إعلام 

قبضوا علينا فى الاحلام 

قولى يا شاطر منك ليه 

يعرف حد يزغط بطة 

وكمان قولى يا شيخ محمود 

حزمة جرجير فيها كام عود 

نط بسرعة الواد قرموطى 

هيرقصكوا كمان ع التيت 

أصل الواد بيبيع مانشيت 

دخل العم عماد 

بهدووووووووووووووء 

قال انا داخل بالصندوق 

بس يارب الكل يفوق 

بدل الكلة يشم نشوق 

وادى برنامج ع التحرير 

أحمد موسى عاملى وزير 

كان متربى فى امن الدولة 

واكل أكل أمن الدولة 

والجمبرى من أمن الدولة 

واحنا معاه بلا قوة وحولا

مصطفى بكرة واخدها مقاولة 

طالع نازل على القنوات 

كله حكاوى كلام ستات 

كل كلامه من الزنبيل 

مرة سمعته بيقول نكتة 

اللى تجيلو فلوس من برة

يبقى خاين وابن عميل 

يرحم ليبيا وفلوس ليبيا 

وكمان سوريا وفلوس سوريا 

اخرس بس خلاص يا عويل 

عمرو أديب يصرخ وينادى 

دول ناس وسخة ودول ناس وسخة 

قولى يا عمرو انت لمين؟

والمعتز قاعد فى الحتة 

كل كلامه مش مفهوم 

كتر همى وجاب الغم 

يزود غمى 

وجاى فى الاخر برضو يقولى 

اوعو تروحوا فى أيها حتة 

بنت الشاذلى كتير حساسة 

تضحك تبكى جوا الشاشة 

واحنا يا ناس عايزين تفسير

عمك تامر ابن أمين 

كله بشاشة 

ولابس لبس جايب له هشاشة 

كله بيقبض بالملايين 

محمود سعد يا محمود سعد 

صاحب صاحبه وملهوش وعد

كنت بتقبض بالملايين 

وقت مبارك .. بعد مبارك

بعت صحابك ليه الحلوين 

هنا القاهرة

براهيم عيسى يشد الفيشة

خش ورزع فى القاعدين 

شبعتنا منك إحباط

ولابس لى لبس الخياط كنت

بتشتم فى العياط 

قولى الوقتى الدور على مين؟

افتح يا ابنى القهوة بسرعة 

الجمهور مستنى الجرعة 

خش ورحب بالنشطاء 

نزل مشاريب من غير مااااااااااااااء 

كله أونطة ... تجار شنطة 

طبعكوا حامى .. الكل محامى 

زود يا ابنى شوية شطة 

بعتوا الارض هتكتوا العرض 

والدولارات وياكوا كتير 

شغل مخابرات عالى كبير 

ومصر ضحية ومستنية 

طعنة ف طعنة

ولسة أبية 

كله اتعود ع التجريح 

بالتصريح أو بالتلميح 

فكركوا عالى مع التسييح 

سيح سيح كله مريح 

كل كلامكوا عبيط وأبيح 

إخرس يلا يا واد يا عبيط 

كل كلاموا طلع شخبيط 

وانا كسرت التليفزيون 

ما انا مش ناقص كتر هموم 

مش راح أشوفك انت وهو 

ولو أعملها هأكون موهوم 

مصر هتفضل غالية عليا 

وانتو حسالة .. فرز نخالة 

كل الناس عارفاك يا عبيط 

أصلى زهقت من المسخيط