مالناش أيام وساعات معدوده
هدتنا الغربه وأشتقنا العـوده
واحشتنا اللمه وكلمة يامه
والتوب البلدى ولف العـمه
وحبيبتي الصابره
أم رموش سمره
المشتاق طرف عنيها السوده
مشتاق للجرن وعيش الفرن
السخن البر المتشمس
ولفحل بصل مع نحل عسل
علي صحن مدمس ونغـمس
مشتاق للضحكه وسط الصحبه
علي دكه وكنبه بفـرشة حصير
للقعده الأرضي ف بيتي وأرضي
لشرب ميه ف كوز م الزير
حـنيت لأبوى وعمي وأخوى
ولعـب عصاية جـدى العـوجه
ولريحة النهر ف نص الشهر
والقمره بتسـبح ف الموجـه
واحشتني السهره ف ليل الحضره
ورقص المهـره عـلي المزامير
وتسالي ياحمص لـب وترمس
وحــلاوة الـمولد والصفافير
مشتاق للغيط وحيطان البيت
وعيال حـتتنا وشقاوتها
لكلام وحديت وحجاوى حواديت
الخوف م الغولة وعفاريتها
مشتاق لحدود حيلي المهدود
ف هواى لبلادى ومعانيها
للناس والعشرة ودفئ الأسرة
وكل شبر ف أراضيها .......
عبدالباسط محمد
إرسال تعليق